![](uploads/news/653697b096fba6.43308969.jpg)
გამარჯობა,
მე იოსებ კენჭაძე ვარ, იმერეთიდან, კერძოდ ტყიბულის რაიონის სოფელ გელათიდან, პროფესიით იურისტი, ხოლო კერძო საქმიანობის კუთხით მაქვს საოჯახო სასტუმრო „ვილა გელათი“. საქმიანობის შესახებ ცოტა უფრო ადრინდელი პერიოდიდან მოვყვები, 2016 წელს დავიწყეთ ჩვენი წინაპრების სახლის საოჯახო სასტუმროდ გადაკეთება. ჩვენთან სულ სტუმრიანობა იყო, მუდამ ვიღაც რჩებოდა ღამის გასათევად, რადგან ყველას ძალიან მოსწონდა პირველ რიგში გელათის მონასტრის არაჩვეულებრივი ხედი და რა თქმა უნდა იმერული სტუმარ-მასპინძლობა. იდეაც ამ დროს გაჩნდა, როდესაც მე საერთაშორისო ორგანიზაციაში ვმუშაობდი და ორი უცხოელი თანამშრომელი მყავდა სტუმრად. მათ მირჩიეს ბიზნესის კუთხით მეცადა შემეხედა ამ ყველაფრისთვის და Airbnb-ზე განმეთავსებინა განცხადება. თვითონვე დამეხმარნენ განცხადების მომზადებაში და იმდენად დიდი მოწონება წამოვიდა რომ იმის მერე აღარც დავფიქრებულვართ.
ეს იყო იდეა და შემდეგ მისი განხორციელებისკენ ნაბიჯ-ნაბიჯ სვლა, ყოველ სეზონზე თითო ოთახს ვამატებდით სტუმრების მისაღებად, ხოლო სრულყოფილი სახე ჩვენმა საოჯახო სასტუმრომ ევროკავშირის, შვედეთის და ავსტრიის მხარდაჭერით განხორციელებული პროექტ GRETA-ს ფარგლებში მიიღო. გრეტას შესახებ მეგობრებისგან შევიტყვეთ, დავინტერესდით და გამოჩნდა რომ ტურიზმის, რეგიონის და ენერგოეფექტურობის ნაწილში ჩვენი გეგმები პროექტის პირობებს ემთხვეოდა. ასევე მოგვეწონა დონორი ორგანიზაციებიც, რომელიც თანამშრომლობის შემთხვევაში იმიჯურად წაადგებოდა ჩვენს წამოწყებას.
რამდენიმე ეტაპის წარმატებით გავლის შემდეგ გავიმარჯვეთ და მივიღეთ დაფინანსება. ამ დროს უკვე გქონდა მესამე სართულის მოწყობა დაწყებული, მიდიოდა 6 ოთახის მომზადება და აღჭურვა და შესაბამისად ჩვენც გრეტადან მოვითხოვეთ რეალურად ის დახმარება, რაც განვითარების ამ ეტაპზე იყო ჩვენთვის სასიცოცხლოდ მნიშვნელოვანი. ესენი იყო ავეჯი და ტექნიკა, რომლებიც ოთახების სრულად მოწყობისთვის გვჭირდებოდა, ასევე ელექტრო სადგური, მზის პანელები რომელიც დაგვიზოგავდა ელ-ენერგიას.
ბიზნესში, მითუმეტეს დამწყები როცა ხარ, მნიშვნელოვანია დახმარებები რომლებიც იწვევს სიმყარის განცდას და განაპირობებს განვითარების შესაძლებლობას. ჩვენს შემთხვევაში დონორების გაწეულმა დახმარებამ სრულყოფილად ამუშავებაში შეგვიწყო ხელი, ასევე მოგვცა სტიმული და სიმყარე; თუნდაც რემონტის დროს, როდესაც ვიცოდით რომ ბოლოსკენ უკვე ტექნიკას და ავეჯის ნაწილს გრეტას დახმარებით მოვაგვარებდით, ეს დიდი მოტივაცია და სტაბილურობის განცდა იყო ჩვენთვის.
აღნიშნულმა მდგრადობის გაჩენამ გამოიწვია წარმატება, რასაც სტუმრების რაოდენობის გაზრდა ჰქვია. დაახლოებით 40 % გაიზარდა მათი რაოდენობა, გაიზარდა მიღების უნარიანობა, გაიზარდა მომსახურების ხარისხი, რადგან ახლა ვთავაზობთ სრულყოფილი მომსახურებას. რომ შევაჯამოთ დახმარების შედეგად გავზარდეთ ხარისხი და შევამცირეთ ხარჯი.
მართალია დღესდღეობით ჩვენა არ შევდივართ ტოპ სასტუმროებში, მაგრამ კარგ და ხარისხიან სერვისს ვთავაზობთ სტუმრებს და კიდევ უფრო მეტად დავხვეწავთ. ასევე გვინდა ორგანული პროდუქტებით დამზადებული საკვები შევთავაზოთ სტუმრებს და ამ მიმართულებას სულ უფრო და უფრო მოვაძლიერებთ. წარმატების ეს ეტაპი კი გამოიწვია გრეტა პროექტის ფარგლებში მიღებულმა დახმარებამ, რომელიც რომ არ გვეცადა, შედეგს ვერ მივიღებდით. შესაბამისად მეწარმეები არ უნდა შეუშინდნენ და აუცილებლად ცადონ, რადგან ეს მგონია წარმატების მთავარი გასაღები.
სამომავლო გეგმებში არაგენმოდიფიცირებული საკვებისგან შემდგარ სამზარეულოს გაკეთებასთან ერთად შედის მარკეტინგული აქტივობა, ბრენდის შექმნა მათ შორის და მასშტაბის კიდევ უფრო გაზრდა. აქედან გამომდინარე ახალ ინიციატივებთან და საგრანტო პროგრამებთან სათანამშრომლოდ მზად ვართ და საკონტაქტოდ ღია ვართ სოციალურ ქსელებში, განთავსების ყველა პლატფორმაზე და ელ-ფოსტის: lcgumbrella@gmail.com და ტელეფონის: 597007780 საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის